【短篇小论】花都公汽/富都海格KLQ6850GAHEVC5E

广州就好鬼奇怪嘅，一到年尾就特别都新车上路嘅，呢几日广州最北边嘅从化顺途公司第三批福田BJ6105PHEVCA-10上路了(其实我就怀疑同第二批车係同一批嘅)，广州最南边嘅南沙巴士宇通ZK6105CHEVNPG21又上路了，一个最北一个最南，直线距离都成九十几一百公里，真係权威先可以日日去追了。咁我呢，就近近地，睇下之前谍报家讲过嘅海格KLQ6850GAHEVC5E，呢款车係花都公汽同富都公司一齐招标嘅，而且配置基本上都一样，咪放埋一齐讲啰。如果你问依加值唔值得去花都威呢？我就话不如等埋花都恒通公司嘅宇通H8上路再去都未迟了(花都权威快啲同我讲下今日H8有冇上路)。讲翻呢批车，花都公汽就一共买咗40台，自编范围为442-481，有趣嘅係，貌似依加只有自编为457-460呢4台车服役于花26线(再求花都权威睇睇今日开新线之后剩余嘅车有冇上路)，其它嘅车都好似继续喺广清高速旁边训大觉→_→最想吐槽嘅係电牌嘅质量，即使实际上係贴通达牌嘅思创电牌，质量都传承思创嘅质量，新车就坏牌，实在係叻叻叻。

而富都公司就一共买咗14台车，自编范围为156-169，同我之前预测嘅一样，呢批车用来取代宇通“螳螂”同金旅“马可波罗”(连智能机都喺旧车上面拆落来用，智能机号同旧车对应)。同样地，富都嘅车都未上齐，而且最有趣嘅係，原本要开通嘅花92线尚未开通，车辆拿到花8线来用，真係有趣过有趣。外观唔使多讲啦，两间公司嘅车都采用俗称“面包头”嘅9系造型，花都公汽嘅车继续采用“插电式”公汽涂装，而富都公司嘅车就将之前狮岭公汽嘅紫色“八方达”涂装改为同正版“八方达”一样嘅绿色涂装，用喺新车上(假装自己俾北京大财团收购→_→)。外形尺寸方面，呢款车嘅长宽高为8549mm×2440mm×3190mm。

睇睇司机位，肉酸嘅仿桃木内饰就放过佢啦，唔想再提了。由于都係统一招标，两间公司嘅车配置都差唔多，CAN总线同样采用海格自家制嘅创程CAN总线，刹车阀同样采用万安出品。两间公司嘅车最主要就係空调控制器以及部分按钮摆放位置有所不同(尤其係车门开关按钮)。可以睇到，呢批车同样采用咗海格第三代混合动力系统，就係时下最流行嘅ISG电机+驱动电机嘅混联无变速箱设计。

睇睇乘客区，都係果句话，由于两间公司嘅车都係统一招标嘅，所以内饰风格都差唔多，最有趣嘅係，呢批新车嘅座椅为花都本地企业——欧美斯金利嘅出品。大家都可以睇到，呢款车空间利用率其实都係无法吐槽嘅。呢款车同好多8米插电车一样，24V电池移到咗车辆嘅中右部，所以呢款车嘅乘客区中部都係凸出来嘅。气瓶摆放导致乘客区右部嘅座椅采用地铁座布局，再加上右边24V电池嘅“占地空间”，呢款车根本企唔到人，富都嘅花8线采用呢款车简直就係一个噩梦。

机械方面，两间公司嘅车都采用最大功率为132kw嘅玉柴YC4G180N-50国五天然气发动机，电机采用功率为80Kw嘅海格自家制HC-HDM3040永磁同步电机，空调采用精益JYKT22B1，电池采用惠州市亿鹏能源科技有限公司出品嘅锰酸锂电池。

底盘行走方面，两间公司嘅车地台都采用二级踏步设计，前后车桥均为方盛出品，前后均采用单推式碟刹(之前谍报嘅报道出咗偏差，笔者对此表示遗憾，而且呢一批车係广州第一批前后碟刹嘅8米级公交车？)，悬挂采用前三后四钢板悬挂，配有与万安刹车阀配套嘅ABS系统。

贴上铭牌，两间公司嘅车均为2016年9月生产。

配置一样，涂装唔同嘅车坐起有冇咩唔同呢？答案就係冇，因为两间公司嘅车都係采用翻厂家人员设定嘅调教。呢度有一段富都车行车嘅视频(建议大家喺WiFi环境下观看视频，土豪请随意)，涵盖咗纯电模式、混合模式以及纯燃料模式。可以睇到，呢款车纯电模式开启时间都算长，0-35km/h都为纯电模式，35-50为混合模式，50-69为纯气模式。讲真，坐起身嘅感觉还可以嘅，就係停低果阵电池冇电帮电池充电果阵发动机震动较大。讲驾驶感觉嘅话，富都嘅司机觉得还可以，唔使换挡，车又灵活，就係装唔到客俾差评。然而花都公汽嘅司机却觉得呢款车勉勉强强，事关以前开过宇通插电嘅佢哋觉得呢款车远远都比唔上，据闻车速超过50km/h之后方向盘就会有种乱咁筛嘅感觉，唔通係电动方向油机出咗问题？呢个都係留翻俾厂家同花都公汽嘅技工来解决啦。