【短篇小论】新穗&一汽广汽比亚迪GZ6120LGEV2

好，又发比亚迪，不过今次发嘅两间公司同一款车嘅对比又好似对比唔出乜嘢咁样，点解咁讲呢？因为新穗同一汽嘅比亚迪无论从外观、内饰、机械底盘配置方面来讲基本上都係一样嘅，甚至连司机位嘅司标都係标注成一汽巴士(当年嘅广汽GZ6113PHEV5就出现过呢种情况)。既然係咁，点解重要发啊？因为突然发现一个好严重嘅问题，好似除咗二汽溢通、一汽、新穗、电车呢四间公司嘅K9F之外，其它公司嘅车都好似冇上到牌。而电车公司只有10台K9F上牌投入运营，一汽更少，只有三台。点解其它公司嘅车上唔到牌呢？因为依加上咗牌进行运营嘅广汽比亚迪K9F都係喺旧年嘅12月30号抢闸上牌嘅，点解会咁样呢？重记唔记得之前我讲过嘅一个问题？就係广州购入嘅呢一批K9F嘅合格证迟迟都办唔落来，导致车辆根本无法上牌。拖到2017年，呢批车上牌就更加难了，因为呢批车嘅电池容量及其它技术指标都同新国标不符，导致无法上牌嘅局面。据闻，未上牌嘅车又绝大部分从用户嘅手上退回到从化比亚迪厂等待改造，以符合新国标标准进行上牌工作。所以如果笔者唔发电车嘅比亚迪呢，就应该好耐都睇唔到我发比亚迪了...

其实呢，喺拥有可上路嘅比亚迪K9F嘅四间公司中，新穗车占嘅比例係最大嘅，新穗一共有21台K9F，自编范围为0615-0635，其于1月25日上路，全数投入到226、244呢两条线路进行运营。而一汽虽然购入66台比亚迪K9F，但只有4415、4418、4437呢三台车登记上牌，呢三台车于3月1日开始上路试运营，早高峰时段运营于78路区间短线，晚高峰时段运营于901A、903路区间短线。3月3日，一汽三台比亚迪全数于78路正式上线，为单班车。

睇翻车辆嘅外观，可以睇到两间公司嘅车都采用咗富有广州特色嘅封尾造型(出咗广州你搵部带尾翼嘅封尾比亚迪俾我睇睇？)，据目前所知，除咗一汽同新穗嘅车采用封尾造型之外，三汽、马会嘅K9F都采用咗封尾造型。头先都讲咗，两间公司嘅车喺外观上都生得差唔多款，係要搵区别嘅话，咁就係自编同门位司标，以及一个係“蓝蚊香”电牌，一个係“大白菜”电牌。既然外观“一模一样”，外形尺寸就当然一样啦，两批车嘅长宽高都为11980mm×2540mm×3300mm。

睇睇司机位，布局都係惊人地相同，除咗新穗嘅智能机放喺监控七寸屏下面，一汽嘅智能机放喺窗边之外，都係一模一样嘅。可以睇到，两批车同样采用吊脚式嘅油门踏板同刹车踏板，CAN总线同样采用比亚迪自家制产品，当然啦，两批车都有比亚迪嘅特色无匙启动系统(其实就讲废话，部部比亚迪K9都係咁)。该有嘅都有齐，唔该有嘅嘢都继续有，呢两批车嘅“SOS”求救按钮都放喺司机嘅右手边，真係妈妈再也不用担心我被歹徒发现我喺度叫救命了...

驾驶区高度同化，乘客区都係一样，可以讲，唔睇车内宣传画同导向图嘅话，真係好难分得出图中嘅内饰係属于边间公司嘅车。两间公司嘅车都采用拉丝铝扶手搭配橡胶防滑扶手套，座椅均采用春山CS00331轻质铝塑座椅。同样地，两间公司嘅车虽然都有残疾人轮椅踏板和水塘区，但係水塘位除咗果条三点式安全带之外，就冇咩辅助设施了，真係搵笨。

乘坐感受方面(建议大家喺WiFi环境下观看视频，土豪请随意)，其实都係差唔多，动力性能唔差(尤其係新穗嘅司机可以将呢款车揸到60以上...)，气囊偏硬(尤其係78路行走于岑村公路、行云街、岳州路、大丰路路段真係会令人觉得十分酸爽)，电机共振及其带来嘅噪音依然令人感到不快。不过都係果句话，年坐过当年电车公司当年购入嘅K9A之后，你就会觉得K9F算好了...

新穗版本

一汽版本

机械方面，两间公司嘅车都采用两个比亚迪自家制嘅BYD-TYC90A双轮边电机，单个电机最大功率为90Kw，空调采用松芝JLD-ⅡE-D。都係果句话，封尾嘅车维护起身容易得多，无论係检查电机控制器、电动打风泵定係转向油泵都十分方便。

可以睇到，由于呢款车有两个电机，所以电机冷却水箱就有两个，其布局于两侧车尾。另外可以睇到，呢款车喺右侧水箱上面设有两个直流充电口。

电池方面，当然都係采用比亚迪自己嘅招牌产品——磷酸铁锰锂电池，其分别布局于车尾两侧以及车顶。由于呢款车係低地板车，以及车尾空间基本上都被利用完，所以呢款车嘅24V电池就放到车头司机位下面嘅位置，同24V电池以及底盘自动润滑打油机放埋一齐。

底盘行走方面，两间公司嘅车可以讲都冇差别，底盘同样都係采用一踏低地板设计，带车身升降系统(ECAS)，悬挂采用威巴克气囊避震，前桥采用东风德纳出品，后桥为比亚迪出品，前后桥均为克诺尔双推式碟刹，带ABS。车胎采用两间公司都经常配备嘅万力SAU01，搭配美铝轮圈。

最后贴上铭牌以及行驶证，两间公司嘅车都为2016年9月“出厂”(实际出厂时间你明白嘅)，上牌时间均为2016年12月30日。另外有一样好有趣嘅嘢，两间公司嘅车嘅行驶证照片都係一样嘅，而照片入面嘅车居然係电车公司嘅车...算了，行驶证照片都係唔好咁认真啦。