【短篇小论】珠海公交广通GTQ6605N5GJ

提起广通出过嘅奇怪小巴，大家可能就会霖起湛江同佛山高明嘅GTQ6510N4B，果款车就够晒得意了，又细部又四四方方。但係除咗呢款车之外，广通重有冇出过奇奇怪怪嘅小巴呢？答案係有嘅，呢款车重奇怪过GTQ6510N4B，佢就係本文嘅主角——俗称“冒险鸭”嘅GTQ6605N5GJ。呢款车最过瘾嘅地方係乜嘢？就係佢够矮啰！据说，呢款车只有2.42米高(但係公告显示係2.5米)。点解要将车设计得咁矮呢？其实呢款车主要係为通过井岸大桥嘅315线而设计，而井岸大桥限高2.5米，当时315线嘅配车为五菱GL6462L。道路通行条件有限，乘客出行需求有增无减，以及车况问题，都令到315线嘅“五菱仔”满足唔到乘客嘅需求，因此，珠公急需定制一批新车来取代五菱仔了。于是，身为地产嘅广通汽车又再出马，设计出呢款即可满足道路条件，又可以提升载客量嘅神器。2014年1月中，新车正式上路，大大地降低315线嘅运营压力，同时为珠海广大西部区域引入一款新嘅村巴。咁就有人会话，依加井岸大桥都唔限高了，重有冇其它地方需要用到呢款车先可以过桥呢？斗门嘅402A线(通过上横大桥)、413线(通过白藤水闸)以及金湾红旗嘅Z121线(通过白藤水闸)就必须要用呢款车了。另外，斗门411线由于要上山以及通过金台寺牌楼，同样采用该款车辆(但係问题来了，广通GTQ6857N4GJ同中通LCK6850HGN都可以过到呢个牌楼，但係可能因为过于危险嘅原因，411线都係继续采用冒险鸭作为配车)。(413线通过井岸大桥限高龙门架以及402A线通过上横大桥限高龙门架图片由@lzy_zh 提供)

睇睇外观，矮矮嘅车身虽然有种怪怪地嘅感觉，但係不失为一种风味。可能因为车身扁长，而且又可以“上山下海”，慢慢哋，呢款车就被叫做冒险鸭了。外形尺寸方面，呢款车嘅长宽高为6005mm×2210mm×2450mm。

睇睇司机位，同普通嘅村巴差唔多。不过根据开车嘅师傅所讲，可能因为引擎舱设计问题，密封性唔係太好，热气同灰尘经常传到车内，十分恶顶。加上车头空调出风口唔够，工作环境更加恶劣，大多数车辆都有增加通风喉， 以降低劳动强度。

睇睇乘客区，其实布局都比较紧凑，全车一共有17张座椅(原装车辆喺司机位旁边有一个领航座，后来基本拆咗)，讲真，呢款车虽然载客量比“五菱仔”高，但係因为车细，载客量真係认真嘛嘛。企人嘅空间主要集中喺车嘅中部位置，不过呢款车咁矮，企咪好难企？唔使担心，呢款车嘅中部设计咗一个大天窗，既可以通风，又可以增加乘客区嘅站立高度，可谓良心设计。

乘坐感受方面(建议大家喺WiFi环境下观看视频，土豪请随意)，除咗车矮令人感到压抑而感到唔舒服外，其它嘅感觉都算係咁。悬挂虽然偏硬，但係比好多牌子嘅村巴要好了。发动机功率虽然偏细，但係上桥果阵压力都唔算大。

机械方面，呢款车采用最大功率为73kw嘅东风南内NQ120BN5国五天然气发动机，搭配星瑞1700JH400 5速手动变速箱，空调采用科林诺N。可以睇到，由于离地间隙比普通嘅村巴有所降低，水箱嘅离地间隙都比较低，水箱下水室都撞花晒了。

气瓶方面，呢款车采用150L嘅圣达因气瓶，容量同普通嘅村巴差唔多。

底盘行走方面，呢款车采用江淮HFC6576NY2V三类底盘，地台采用二级踏步设计，前后车桥均为江淮出品，前后鼓刹，悬挂采用前三后四钢板悬挂。睇下底盘设计，其实都几紧凑，不过有样嘢好奇怪。虽然呢款车配有底盘自动润滑系统，如果笔者冇眼花嘅话？好似前钢板销冇设计润滑喉？而后钢板销就配有润滑喉，实在有趣。

最后贴上铭牌，2013年11月制造。